Kaya biasane, sekang taun maring taun, ngerayakna malem pergantian taun kuwe uwis dadi tradisi sing dilakokna deng wong-wong, termasuke juga rika mungkin. Nah nggo sing mengko malem taun baru arep ngerayakna, inyong duwe tips sing bisa rika lakoni, tapi nek ora lakoni ya ora papa sih, toh juga rika dhewek ikih sing arep ngerayakna. Oke, langsung bae ya, tips nggo sing arep ngerayakna malem taun baru :
1. Adhus.
Kiye penting. Sedurunge mangkat, lewih apike rikane adhus dhisit. Sebabe seganteng-gantenge utawa seayu-ayune rika, mesti tetep mambu wedhus nek ora adhus. Nek karo sabun biasa ora nolong mambu awake rika, ya adhus ngganggo karbol juga olih.
2. Kostum.
Milih kostum sing patut karo nyaman kuwe juga ora kalah pentinge. Inget ya… kiye malem taun baru, aja nganggo batik lengkap karo kathok bahan, ujar-ujare toli arep kondangan ndeyan? Nganggo bae klambi utawa kaos sing pantes, aja kelalen nggawa jaket ya, sebabe malem pergantian taun kuwe mbengi udu awan-awan, biasane nek mbengi hawane mesti atis.
3. Nggo sing arep jalan bareng karo gendakane. Inget ya, mojoke tetep neng keramean, udu neng tempat sepi apa maning neng kuburan, ujare arep uji nyali?
4. Siapna sangu secukupe. Selarang-larange jajan neng malem taun baru paling ya nggo tuku trompet karo kembang api kan? Siji maning, kurangi barang-barang sing terlalu mencolok mata. Contone : sapu sada, sindik cilok karo sumpit. Kiye penting nggo menghindari tindakan kejahatan karo tindakan kecelakaan.
5. Nggo sing uwis tuku kembang api, dipastina sepisan maning bahwa sing rika tuku kuwe bener-bener kembang api, udu bom.
6. Nah tips sing terakhir nggo sing uwis tuku trompet. Sedurunge digunakna nggo malem taun baruan, ana apike dianakna gladiresik dhisit. Supayane pas jam 24.00 teng mengko trompet sing dionikna bisa ngasilna suara sing kompak karo serempak, ora awut-awutan seenake wudele dhewek. O iya, siji maning, sedurunge dienggo aja kelalen trompete disetel dhisit ya supayane suwarane ora fales.
Sekian tips sekang inyong. Dilakokna ya monggo, arep ora ya belih, sebombonge rika pada. Maturnuwun.
Penulis : Slamet
